Cerpen Bahasa Using Banyuwangi, Judul: Sing Nyana

Cerpen Bahasa Using Banyuwangi, VIVA Banyuwangi –Nia keranta-ranta nyawang poto iyane keloron ambi Dimas. Uwong lanang kang dadi demenane.

Eluh sing bisa diendekaken kerana magih katon ring mata dhonge iyane ngeculaken nggenggeman tangan Dimas hang arep menyang nang Pulau seberang.

Semilire angin ring dermaga ngademi dina pisahe Nia lan Dimas sore iki.

Dimas pamit nang Nia arep mulih nang pulau cilik ring sekitare Lombok.

“Aja rika tangisi lakunisun iki. Isun menyang sambang wong tuwek ring pulau. Sedelo musti balik merini maning.”

Nia sing semaur, iyane mung manggut ambi ngempet iluh makene sing mili.

“Isun berangkat nggawa janji. Semunu uga rika, mugi bisa njaga welas hang ana ring ati sampek tekane isun.”

Sing sampek nunggu kapal melaku ninggalaken dermaga, Nia mulih nggawa angenan.

Wayah bengi, Nia sing bisa turu nganteni kabar wis gadug endi lakune kapal hang ditunggangi Dimas.

Ambi deleng berita-berita hang ana ring hape. Derijine Nia mandheg nggingser layare hape kerana weruh ana berita kang rame yaiku keleme kapal hang nuju nang pulau Lombok.

Atine Nia jemedhut, tangan metu gemeter kerana namataken video keleme kapal hang rupane percis kaya kang ditunggangi Dimas.

Ketimbang ati tambah sing karuan, iyane nggoleti nomere Dimas uga ditelepon.

Taping telepone mung memanggil. Terahir dideleng telung jam kepungkur.

Nia mung bisa mikir apik. Mugi duduk kapal hang ditunggangi Dimas.

Dhung mulo iyo, mugi diparingi selamet. Sewengi jampleng Nia sing turu. Terus-terusan nelepon nomere Dimas.

Taping sampek wayah wis ganti isuk, magih bain sing keneng ditelepon.

Nia uga menthelengi kabar hang ana ring hape, sampek Tim SAR teka nyelametaken sekabehe uwong hang ana ring kapal iku.

Naming, kabar kang pungkasan muni dhung sekabehe penumpang lan awak kapal sing ana kang bisa diselametaken kerana antere arus lan gelombang laut.

Tangise Nia pecah rungu kabar hang gedigu mauko. Dina wis ganti dina.

Ulan uga ganti Ulan. Sing ana maning eseme Dimas sing ana maning gesahe Dimas.

Sekabehe wis kanyut ambi banyu segara. Nia wis nyacak ngiklasaken taping perih ring ati sing bisa diobati.

Sayu kanca pareke Nia sing tega nyawang kahanane Nia hang saya suwi saya susah.

Sayu duweni kekarepan ngajak Nia ngelencer menyang Bali makene bisa madhangaken atine Nia.

Ring Bali, Sayu ngajak Nia melaku-melaku nyang pinggir segara.

Ring kana Nia bisa berak sak kuwate kanggo ngetokaken paran kang ana ring ati.

Banget-bangete berak hang kaping pindho, cangkeme Nia ana hang delekep teka mburi.

Sing nulih nong uwong hang delekep. Nia mung meneng ambi nangis.

Lamat-lamat iyane rungu suwara hang wis lawas sing tau mampir nang kupinge yane.

Nia uga nulih nang uwong hang ana ring burine. “Dimas… temenan iki sira?” ambi tangan ngelus pipine Dimas. “Iyo, iki isun.

Sepurane isun sing bisa nguweni kabar.” Nia saya nangis geruh-geruh.

“Temenan ta iki hang ana ring ngarep isun. Iki kabeh dudu ngimpi kan?” Sayu kang ana ring sandinge Nia, meluk Nia ambi ngantepaken atine Nia.

“Iya Nia iki Dimas. Kelendi ceritane kok iro ana ring kene?. Kabeh uwong sing ana kang selamet nang kapal iku?” “Isun wurung nunggang kapal.

Kerana tas isun dijambret uwong. Isun mung ngesaki picis sak anane. Hape kegawa jambret ring njero tas.

Kadine isun sing bisa ngabari sapa-sapa. Nang Bali iki, isun megawe ngumpulaken picis makene bisa ketemu maning ambi Nia.

Taping Pengeran duweni cerita liya, Isun lan Nia bisa ketemu ring kene.” Nia sing bisa muni paran-paran. Iyane mung bisa meluk Dimas sak kuwate.