Cerpen Bahasa Using Banyuwangi, Judul: Anak Kemunjilan

Teka pawon Bik Siti mung semaur, “aja ngimpi ta Kang. Isun ngerti, rika kangen ambi anakrika iku. Wis ta, dungakno bain geningna Rodiya selamet ring negarane uwong”.         

“Isun sing ngimpi Dik, iki bener-bener Rodiyah anak rika. Merinia ta delengen, anak rika tambah ayu gedigi ya Dik,” jare Man Usik ambi terus meluk Rodiyah.

Bik Siti hang ring pawon agage metu rada kepelayon matani lakine.

Iyane kelunjuk ndeleng lakine meluk lare wadon ayu hang rambute semiran rada coklat.

Tepak wis parek ring lakine, buru Bik Siti milu nangis. Temakaken paran hang diomong lakine bener.

Rodiyah hang wis limang taun sing mulih, dina iki mulih.

Malahan mulihe Rodiyah ambi nunggang montor apik. Iku hang nggawe tambah bungahe atine Bik Siti lan Man Usik.            

“Pak...isun mulih ambi lakinisun Pak. Iki lakinisun, asli teka Jepang,” jare Rodiyah ngenalaken lare lanang nggantheng hang bareng ambi Rodiyah.  

“Sepurane Pak .. Mak, isun nekah sing warah-warah ambi emak lan apak. Isun wis nekah ulih setahun iki. Marek nekah isun langsung diboyong ring Jepang. Iki isun buru mulih teka Jepang, kangen ambi apak lan emak,” jare Rodiyah.

Lakine Rodiyah mung mesam-mesem bain. Temakaken mulihe Rodiyah mula arep mulyakaken wong tuweke.