Cerpen Bahasa Using Banyuwangi, Judul: Pacet Singidan

Cerpen Bahasa Using Banyuwangi, VIVA Banyuwangi –Gemericike banyu mili ring Kali Bendo isuk iki, kerasa ngadhemi pikiran. Isun lan anak-anak Isun, Jainik ambi Ropik ngerekep awak ring ilen-ilene banyu iki. Seru girange nyawang Jainik, anak isun kang penggarep ciblung lan sembur-semburan banyu ambi adhike.

Baca Juga

Resep Ayam Betutu Bali yang Gurih, Pedas, dan Harum

Saya suwi saya kerasa adhem sampek nong belung-belung. Sunare srengenge ana ring dhuwur endhas.

Lambe disawang saya tambah biru. Kulit deriji tangan wis mangkat kesut.

Baca Juga

Bau Menyengat Limbah SPPG Bajulmati Resahkan Warga Wongsorejo

Taping semunu muka sing dirasakaken lare-lare. Ropik anak isun kang cilik magih umur telung taun ngerekep seng keneng dientas.

“Ayok, lare padha mentaso. Kesok maning. Delengen lambeniro wis padha biru. Iki andhuke, mari digu enggonen kelambine ambiyo caring.” Nyawang lalare wis padha caring, Isun peruput-peruput penganggone lalare kang teles ring njero keresek cemeng.

Baca Juga

Best Goal Keeper Nuswantara Cup U12 2026 Disabet Line Up Diklat Persema Malang, Dastant!

Uga muleh nunggang sepedha udhud ketelon. Dina ganti dina sing kerasa wis seminggu kelakon.

Arep ngajak lalare memengan nyang banyu Kali Bendo maning, taping mangsa wis mangkat rendheng.

Dhung nyang Kali Bendo biyasahe banyu kethuh kerana sering belaburan.

Ring tengenisun Ropik ngedimpel meluk isun. Sun rasakaken awake kaya anget.

Sun peluk uga sun pangku. Saya suwi awake saya manas-manasaken.

Sun njuwut obat lan sun ombekaken. Sun gindhong lan Sun kusuki bun-bunane.

Sun kemuli makene keringeten. Wis telung dina, Ropik magih durung adhem. Sun kepiran, mesti ana kang salah ambi awake.

Dhung mung panas biyasa, mustine mari ngumbe obat awake bisa adhem.

Sing mikir kesuwen-suwen. Sun gawa Ropik menyang Rumah Sakit.

Adheme angin dhalu iki, sing sun rasakaken. Sun terajang bain makene gancang gadhuk Rumah Sakit.

Ring UGD, Ropik uga diperiksa lan dijuwut getihe. Mastekaken ana penyakit paran nong awake.

Ambi nganteni ulihe periksa. Ring bacote Ropik katon mili getih seger. Isun sakal kaget gupuh nyeluk perawat kang ana.

“Dhok! Tolong apuwo anak isun iki. Gok mili getih teka bacote.”

Sekala iku dhokter lan perawat milu gupuh ngerumat Ropik.

Halaman Selanjutnya

“Bu, deleng asile laboratorium, anak riko iki keneng Demam Berdarah. Kadine kudu rawat inap ring kene."