Cerpen Bahasa Using Banyuwangi, Judul: Anak Kemunjilan
- Istimewa/ VIVA Banyuwangi
Cerpen Bahasa Using, VIVA Banyuwangi –Man Usik ambi Bik Siti soren iku katon mata walangen. Iyane keloron mikiraken anak kemunjilane wadon hang minggat teko umahe. Wis limang taun sing ana kabare. Mangka anak kemunjilane hang aran Rodiyah iku anak hang paling disayang ambi Man Usik.
Naming kerana paling disayang, pungkasane larene rada aleman, diewel sithik bain wis ngambul. Rodiyah duwe kakang arane Samsul.
Samsul wis sing urip sak umah ambi apak lan emake. Kerana iyane wis umah-umah dhewek.
Iyane manggon ring kutha liya ambi rabine lan anak-anake.
Limang taun kepungkur, Man Usik hang megawene tukang sampah kerungu kabar teka sekolaha, dhung Rodiyah hang wis kelas 2 SMA pirang-pirang dina sing melebu.
Mangka saben dina Rodiyah berangkat sekolah. Pungkasane tepak Rodiyah mulih sekolah, ditakoni ambi Man Usik. Taping Rodiyah sing ngaku dhung melincur.
Man Usik ngamuk Rodiyah diewel. Kerana diewel gedigu, Rodiyah dina iku uga minggat teka umahe. Ana hang ngomong Rodiyah minggat nong Bali.
Sakat minggat iku sampek limang taun iki Man Usik lan Bik Siti magih durung tau weruh kelendi kahanane Rodiyah.
Ambi ngumbe wedang kopi lang nyamil gedhang goreng ring bentur umahe. Man Usik lan Bik Siti nggesahaken Rodiyah.
“Kelendi kabare Rodiyah yo Kang. Wis limang taun sing ana kabar. Magih urip ta kelendi lare iku?” jare Bik Siti ambi rada mberebes mili.
“Hus...aja ngomong sak enake. Omongan rika iku bisa dadi dunga. Anakhira iku pinter. Masiya ring negarane uwong, insa allah bisa urip. Muga-muga bain sing salah dalan,” jare Man Usik ambi nyedhot udute hang wis kari uthise.
Ring njaba umah katon dherem, kaya-kaya arep udan. Hawane wis ngangkat kerasa adhem. Mendhung sangsaya peteng.
